Околу 40 отсто од луѓето со висок лош (ЛДЛ) холестерол воопшто не се свесни за тоа. Ако знаете дека имате проблем, имате предност – и еден утрински пијалак може да направи разлика побрзо отколку што мислите. Истражувањата покажуваат дека само една шолја дневно во текот на две недели може да ги намали лошиот холестерол и триглицеридите, а во исто време да го зголеми добриот (ХДЛ) холестерол, пишува „Да се јаде добро“ (Eating well).

Зошто сок од калинка?

Сокот од калинка е препознатлив по својата длабока црвена боја – и токму оваа боја открива зошто е толку моќен. Богат е со полифеноли, силни антиоксиданти кои го штитат ЛДЛ холестеролот од оксидативно оштетување. Кога ЛДЛ оксидира, тој почнува да се таложи на ѕидовите на артериите и да формира плак – токму тоа полифенолите го спречуваат.

Научниот преглед на студиите покажал дека редовното јадење калинки доведува до намалување на триглицеридите и ЛДЛ холестеролот, со истовремено зголемување на ХДЛ. Една студија на возрасни со зголемена телесна тежина и дислипидемија открила видливи промени по само две недели секојдневно пиење една шолја сок.

Бонус: ако со високиот холестерол имате и зголемен крвен притисок, истражувањата покажуваат дека калинката може да помогне и на тој фронт.

Важна напомена: сокот од калинка не е замена за лековите препишани од вашиот лекар, но може да биде вреден дел од исхраната здрава за срцето.

Како да го вклучите во утринската рутина

Не треба драстично да ги менувате вашите навики. Еве три едноставни начини:

Купете 100 процентен сок од калинка без додаден шеќер и без мешавина со други сокови – чистотата на состојките е клучна.

Стремете се кон половина до една шолја дневно. Повеќе не е нужно подобро, а сокот е калорички погуст отколку што изгледа.

Додајте го во смути. Комбинацијата од сок од калинка, спанаќ, бобинки и ленено семе создава пијалак полн со антиоксиданти и растворливи влакна – совршен утрински почеток за холестеролот.

Уште три пијалаци што му помагаат на срцето

Сокот од калинка не е единствената опција. Еве што друго препорачуваат диететичарите:

Смути од овесно млеко – незасладеното овесно млеко, бобинките и чиа се богати со растворливи влакна кои директно помагаат во намалувањето на холестеролот. Идеален појадок во чаша.

Сок од домати – содржи ликопен, антиоксидант од црвената храна кој во истражувањата покажал дека ги подобрува нивоата на ХДЛ холестерол. Изберете верзии со ниска содржина на натриум, особено ако го следите крвниот притисок..

Зелен чај – клиничките истражувања покажуваат умерено, но конзистентно намалување на вкупниот и ЛДЛ холестеролот кај редовните консументи. Ако сакате топол утрински пијалак, зелениот чај е одлична замена за кафе.

Малите, секојдневни навики градат долготрајно здравје на срцето. Чаша сок од калинка наутро не е револуција – но со балансирана исхрана, редовна активност и лекови доколку се препишани, тоа може да биде чекор што навистина се чувствува со текот на времето. Започнете со она што ви одговара и бидете доследни.