Премиерот Христијан Мицкоски очекува следната недела да има поголемо намалување на цените на дизелот и бензините, по последната одлука на Регулаторната комисија за енергетика (РКЕ) со која малопродажните цени на нафтените деривати беа зголемени во просек за 4,55 проценти.

Одговарајќи на новинарски прашања за поскапувањето на горивата и можноста за намалување на акцизите или ДДВ-то, Мицкоски посочи дека акцизите се анализираат на секои две недели, а новата пресметка ќе биде направена по завршувањето на периодот до 31 јули.

-На секои две недели се анализираат акцизите. Во понеделник ќе направиме просек за овој период и врз основа на тие параметри ќе се делува врз цената на нафтените деривати. Добро е што веќе два дена по ред цената паѓа. Денеска се стабилизира околу 85-86 долари за барел, така што следната недела очекувам поголемо намалување на цената на дизелот и бензините- изјави Мицкоски.

Премиерот нагласи дека нафтените деривати се берзански производ и дека сите држави набавуваат од истиот пазар. Според него, Македонија во моментов има најниски цени на дизелот и безоловниот бензин во регионот, а меѓу најниските и во Европа. Последната одлука на РКЕ предвидува максималната цена на бензинот ЕУРОСУПЕР БС-95 да изнесува 93 денари за литар, додека ЕУРОСУПЕР БС-98 да се продава по 95 денари за литар.

Од Регулаторната комисија за енергетика образложија дека корекцијата е направена поради растот на референтните цени на светските пазари. Сепак, посочија дека утврдените цени се максимални, што значи дека трговците можат да продаваат горива и по пониски цени.

Од полноќ поскапуваат сите горива, дизелот оди накај 100 денари за литар