Телата на пет новороденчиња биле пронајдени денеска во семејниот дом на брачен пар во Оринџ, Јужна Франција. Полицијата, според извор близок до истрагата, ги открила останките во картонски кутии. Откритието се случило само еден ден откако мајката вчера родила здраво бебе, објави „Ле Паризиен“.

Извор запознаен со случајот рекол дека жената, родена во 1994 година, го родила своето трето дете вчера вечер. Тоа била уште една бременост што ја криела, наводно нејзин трет таков инцидент. Нејзиниот сопруг не бил дома кога таа отишла во болница со болки во стомакот.

Бидејќи претходно се расправале за содржината на некои кутии во куќата, мажот решил да ги прегледа. Потоа пронашол тело во состојба на распаѓање.

Сопругот ја однел торбата со телото во болница, а персоналот веднаш ги известил судските власти. Кривичната полиција од Авињон го презела случајот и го претресла домот. Истражителите пронашле уште остатоци во куќата кои личеле на фетуси. Тие биле ставени во пластични кеси во кутиите.

Двојката има две деца, на возраст од осум и дванаесет години. Мажот е вработен, а жената е домаќинка. Соседите и познаниците ги опишуваат како луѓе без никакви проблеми или претходни инциденти.

Јавното обвинителство на Карпентрас сè уште не издало соопштение.

Жената е на лекување во болница и сè уште не е официјално уапсена.