Црногорецот Игор Марковиќ беше промовиран за нов селектор на најдобрата женска сениорска ракометна репрезентација на Македонија.

Ракометната федерација на Македонија (РФМ) на новиот селектор му посакува многу успех, среќа и бројни заеднички успеси со македонската репрезентација која ја очекува настап на Европското првенство годинава од 3 до 20 декември што ќе се одржи во пет земји.

Потсетување, нашата селекција на ЕП е во групата Б и ќе игра во Клуж-Напока заедно со Норвешка, Романија и Швајцарија.

– Чест и големо задоволство ми е што ја добив довербата да бидам селектор на женската сениорска репрезентација на Македонија. Се надевам дека со посветена работа, максимална пожртвуваност и заеднички труд ќе успееме од ден на ден да бидеме се подобри. Пред нас е Европското првенство, а претходно нè очекува подготвителен период во кој ќе работиме напорно за да изградиме силен тим. Верувам во добра соработка, добро здравје на сите ракометарки и заеднички успеси со кои достојно ќе ја претставуваме Македонија – изјави Марковиќ.

Претседателот на РФМ, Александар Стефанов на Марковиќ му посака успешна работа, среќа и заеднички да се радуваме на нови успеси на националниот тим.

– Со големо задоволство го поздравуваме доаѓањето на Игор Марковиќ на селекторската позиција на женската сениорска репрезентација на Македонија. Станува збор за тренер кој зад себе има богато играчко и тренерско искуство, а неговите резултати и професионален пристап се потврда за неговите квалитети. Пред нас е исклучително важен период – не очекуваат настапите на Трофеј Македонија, како и подготовките за претстојното Европско првенство. Верувам дека заедно со стручниот штаб и ракометарките ќе изградат силен и конкурентен тим кој достојно ќе ја претставува Македонија на меѓународната сцена – вели Стефанов.