По состанокот на Извршниот комитет одржан во вторник наутро, Француската фудбалска федерација и нејзиниот претседател, Филип Дијало, го објавија назначувањето на Зинедин Зидан (54) за нов селектор на француската фудбалска репрезентација за следните четири години, до Светското првенство во 2030 година.

Зидан станува 18 селектор во историјата на националниот тим наследувајќи го Дидие Дешан. Новиот селектор официјално ќе ги преземе своите должности на 1 август и ќе ја предводи француската репрезентација почнувајќи од новото издание на Лигата на нации на УЕФА 2026-2027. Потоа ќе ја води репрезентацијата во квалификациите за Европското првенство 2028, Лигата на нации 2028-2029 и квалификациите за Светското првенство во 2030 година.

– Нема ништо поголемо од француската репрезентација. Затоа е радост и, секако, гордост да се стане селектор на националниот тим. Тоа е исто така и одговорност. Сакам да им се заблагодарам на претседателот Филип Дијало, на Извршниот комитет и на Француската фудбалска федерација за нивната доверба и да им оддадам признание на 14 години служба на Дидие и неговиот стручен штаб. Не е потребно да се каже дека имам големи амбиции за француската репрезентација – вели Зидан.

Зидан беше без тренерска работа од 2021 година, кога го напушти Реал Мадрид.

Со популарниот Зизу како играч, започнаа годините на доминација на француската репрезентација.

Тимот беше светски шампион во 1998 година, европски шампион две години подоцна, а „триколорите“, со Зидан во тимот, беа финалисти во 2006 година кога загубија од Италија.

Од 1998 година, Франција четири пати беше финалист на Светското првенство.

𝗭𝗜𝗡𝗘𝗗𝗜𝗡𝗘 𝗭𝗜𝗗𝗔𝗡𝗘, 𝗡𝗢𝗨𝗩𝗘𝗔𝗨 𝗦𝗘́𝗟𝗘𝗖𝗧𝗜𝗢𝗡𝗡𝗘𝗨𝗥 𝗗𝗘 𝗟’𝗘𝗤𝗨𝗜𝗣𝗘 𝗗𝗘 𝗙𝗥𝗔𝗡𝗖𝗘 🐓🇫🇷 pic.twitter.com/5ocGyYETNm

— Equipe de France ⭐⭐ (@equipedefrance) July 28, 2026