Директорот на ФБИ, Кеш Пател, повторно се најде во центарот на јавните реакции, откако изби информација дека неговата девојка, кантри-пејачката Алексис Воткинс, добила заштита од елитниот тим специјалци на Бирото – СВОТ (SWAT).

Специјалците, кои се обучени да реагираат на најтешки безбедносни сценарија како масовни пукања и терористички напади, биле назначени да ја штитат Воткинс, која работи во канцеларијата на ФБИ во Нешвил, пишува „Индепендент“.

Она што привлече особено внимание е фактот што Воткинс најчесто престојува во Нешвил, каде што се запознала со Пател, а ретко патува во Вашингтон или Лас Вегас. Поради тоа, критичарите се прашуваат зошто воопшто ѝ било доделено вакво ниво на обезбедување.

„Ова нема никакво оправдување. Станува збор за јасна злоупотреба на моќ и државни ресурси. Таа не е негова сопруга, не живее со него, ниту пак во ист град“, изјави Кристофер О’Лири, поранешен висок агент на ФБИ.

Тој потсети и на уште една контроверзна одлука во истиот период.

„И да додадам, ова се случува токму во време кога одредени личности под реална закана од Иран остануваат без обезбедување“, рече О’Лири, потсетувајќи дека Доналд Трамп го отстрани обезбедувањето на поранешниот советник за национална безбедност Џон Болтон, и тоа откако агент на иранската Револуционерна гарда наводно организирал обид за атентат врз него.

Мандатот на Пател веќе е обременет со низа скандали. Меѓу нив е и откритието дека користел државен авион на ФБИ вреден 60 милиони долари за да отпатува на „вечерна средба“ во Пенсилванија.

Таа вечер, тој присуствувал на боречки настан на кој Воткинс ја изведувала химната. Иако директорот на ФБИ е должен да користи службен авион, тој мора да ги надомести трошоците за приватно патување, што дополнително ја отвори расправата за транспарентност.

Иронијата е уште поголема ако се земе предвид дека пред само две години, во својот подкаст „Кашовиот агол“, Пател жестоко го критикуваше својот претходник Крис Реј, велејќи дека би го „забранил неговото приватно патување“ финансирано од даночните обврзници. И Пател и Реј на позицијата беа назначени од Доналд Трамп.

Во остра објава на социјалните мрежи, Пател ја бранеше употребата на авионот за посетата на Воткинс и ги нападна критичарите кои ја споменуваат неговата врска.

„Критикувајте ме колку што сакате. Но, напаѓањето на луѓе што чесно работат, на мојот личен живот, е срам. Овие валкани, неосновани напади врз Алексис, вистински патриот и жената која со гордост ја нарекувам моја животна партнерка, се одвратни“, напиша Пател.

Тој ја опиша Воткинс како „убеден конзервативец и сензација на кантри сцената“, тврдејќи дека „направила повеќе за државата отколку што многумина би направиле за десет животи“, додавајќи дека нападите врз неа се „кукавички“ и претставуваат „закана за нивната безбедност“.

Паралелно со оваа полемика, Алексис Воткинс поднела тужба против Семјуел Паркер, поранешен кандидат за Сенат на САД, поради неговото тврдење дека таа наводно има врски со израелската разузнавачка служба.

Чистка во ФБИ: Тимот што истражуваше за Трамп е на мета за отказ