Џејк Рајнер, син на покојниот режисер Роб Рајнер, во потресна објава на „Сабстрак“, ги опиша застрашувачките моменти кога дознал дека неговите родители се убиени, како и колку „речиси невозможно е да се сфати“ дека неговиот брат Ник е обвинет за злосторството.

Џејк  детално опиша како неговата сестра Роми го информирала дека нивните родители, Роб и Мишел, биле пронајдени избодени до смрт во нивниот дом во Лос Анџелес во декември 2025 година, пишува „Дејли мејл“.

Џејк напиша дека веста била „премногу тешка за разбирање“ и се присети на 45-минутното возење со такси до семејниот дом, за време на кое, како што вели, бил во еден вид транс.

– Се што можев да мислам беше дека морам да стигнам до домот од моето детство. Морав да бидам со сестра ми. Морав да сфатам што се случило – напишал тој.

Додека сè уште се опоравувал од шокот од смртта на неговите родители, следел нов ужас кога дознал дека наводниот убиец е неговиот брат Ник.

– Таа ноќ изгубивме повеќе од половина од нашето семејство на најбрутален можен начин – рекол тој.

– Секако, секоја загуба на родител е катастрофална, но ништо не се споредува со загубата на двајцата родители истовремено, а покрај тоа, фактот дека вашиот брат е во центарот на сè. Речиси е невозможно да се разбере – додал тој.

Обвинителството тврди дека на 14 декември, Ник ги нападнал своите родители во нивната куќа во Брентвуд, вредна 13,5 милиони долари, ги избодел до смрт и избегал. Тој се изјасни за невин по две точки од обвинението за убиство од прв степен. Тој е во притвор без можност за кауција, а следното рочиште, каде обвинителството ќе презентира докази, е закажано за 29 април.

Речиси шест месеци по убиствата, Џејк пишува дека сè уште е запрепастен од фактот дека член на неговото семејство го извршил злосторството.

– Секој ден од тогаш беше ужасен. Секоја средба што ја имаме, секоја личност со која разговараме, секоја солза што ја пролеваме, секое движење што го правиме е поврзано со убиството на нашите родители – опишал тој.

Кога ја опишуваше маката низ која минуваат тој и неговата сестра Роми, не го спомена својот брат Ник по име, туку му се обрати само со „мојот брат“. Напиша дека нивното страдање продолжува дури и откако случајот ќе исчезне од насловите.

– Кога не поминувате низ трагедија како што поминуваме Роми и јас, тешко е да се разбере колку беше ужасно ова. Бидејќи не се вашите родители, можеби е полесно да се продолжи понатаму или дури и да се заборави за момент што се случи тој ден. Но, за нас, тоа е секој ден.“ – објаснил тој.

Во текстот, Џејк им оддаде трогателна почит на своите родители, нарекувајќи ги „центар на неговиот живот“.

– Тие се моите ѕвезди водилки, основата на тоа кој сум јас како човечко суштество и најдарежливите луѓе што некогаш сум ги познавал – напишал тој.

– Многу луѓе немаат луксуз да ги имаат најдобрите родители, најдобрата мајка или најдобриот татко, но јас го имав. И секогаш ја сметав љубовта што ја имаа еден кон друг во бракот за мерка за успешна врска – додал тој.

Тој се сети како одел на мјузикли со мајка му и на бејзбол натпревари со татко му, признавајќи дека имал привилегирано детство како син на познати родители.

– Не ми избега од глава дека можев да ги имам овие неверојатни искуства што повеќето луѓе не можат поради тоа кои беа моите родители – напишал тој.

– Но, би го заменил секој натпревар на Доџерс, секоја претстава на Бродвеј, секој одмор, само за да поминам уште еден час разговарајќи со нив и да се збогувам – завршил тој во трогателна исповед.

Режисерот Роб Рајнер и неговата сопруга пронајдени мртви, полицијата истражува двојно убиство