Синот на Моамер Гадафи ослободен по 10 години поминати во либански затвор
Најмладиот син на починатиот либиски лидер Моамер Гадафи, Ханибал Гадафи, беше ослободен во понеделник по речиси една деценија во притвор поради исчезнувањето на шиитски муслимански свештеник, објави либанската национална новинска агенција. Ханибал Гадафи беше киднапиран од милитанти во Сирија во 2015 година, каде што живееше во егзил со сопругата и децата откако неговиот татко беше убиен во востанието што избувна во Либија во 2011 година, јави Си-ен-ен.
Препорачано
Обвинет за исчезнувањето на свештеникот во 1978 година
Тој беше приведен од либанските власти истата година и обвинет за криење информации за судбината на имамот Муса ал-Садр, шиитски муслимански лидер кој исчезна со своите придружници за време на патувањето во Либија во 1978 година. Ханибал имал само две години кога Садр исчезнал и не држел никаква висока позиција во Либија како возрасен.
Организациите за човекови права ги осудија околностите на неговото притворање, нарекувајќи ги обвиненијата лажни. Во 2023 година, Ханибал започна штрајк со глад во знак на протест, а неговото здравје последователно се влоши, што бараше хоспитализација.
Кауција и судска одлука
Минатиот месец, либанското судство нареди негово ослободување и одреди кауција од 11 милиони долари. Неговите адвокати се жалеа, а судот ја намали кауцијата на околу 900.000 долари. Ажурираната одлука, исто така, вклучуваше укинување на забраната за патување.
„Ослободувањето на Гадафи дојде откако неговите адвокати платија кауција“, објави државната новинска агенција.
Владата на национално единство (ГНУ) на Абдул Хамид ал-Дбеибе со седиште во Триполи изрази благодарност до либанскиот претседател и претседателот на парламентот за „соработката што доведе до ослободување на Ханибал Гадафи“.
Мистериозното исчезнување на муслиманскиот свештеник Садр пред речиси половина век предизвика децении обвинувања меѓу Либија и Либан. Во својата изјава, ГНУ ги поздрави „искрените намери изразени од либанското раководство за реактивирање на дипломатските односи меѓу двете земји и развивање на политичка, економска и безбедносна соработка“.
