Празничниот период е време на радост, дружење со најмилите и, неизбежно, прекумерно уживање во храната. Се проценува дека просечниот човек само за Божиќ внесува околу 6000 калории, што е двојно или дури тројно повеќе од препорачаниот дневен внес.

Од дополнителна порција печени компири до доцно вечерно довршување на даската со сирења, на сите ни е позната непријатноста што следува по пребилен оброк, пишува „Експрес“.

Киран Џонс, клинички фармацевт од Оксфорд фармаси, открива како да се препознаат знаците за предупредување кои би можеле да укажуваат на посериозни проблеми со дигестивниот систем, па дури и на рак на дебелото црево, токму во време на празниците.

Надуеност и чувство на полност

Чувството на надуеност по обилна вечера е вообичаена појава за време на празниците, особено ако јадете пребрзо или вашиот организам потешко ја вари храната. Тоа е најчесто последица на ширењето на желудникот за да го прими вишокот храна и акумулација на гасови во цревата.

Поблагите случаи можат да се ублажат со антациди, билни препарати како чај од нане или дури и со топла облога. Иако ова е честа појава, надуеноста не би требало да трае подолго од неколку часа по оброкот. Ако потрае со денови, тоа би можело да биде сигнал за проблем со дигестијата или, во најлош случај, рак на дебелото црево и бара лекарска проверка.

Чести одења во тоалет

Прекумерното уживање во храна и пијалаци за време на празниците може да резултира со почести посети на тоалетот, особено по тешки оброци богати со масти и шеќер. Меѓутоа, ако забележите дека во тоалет морате да одите значително почесто од вообичаено, а тоа не е очигледно поврзано со количината на изедена храна, тоа би можело да биде знак за предупредување.

Обрнете внимание на какви било промени во празнењето на цревата, како упорна дијареја или запек, или ненадејна и итна потреба за одење во тоалет. Ако овие симптоми потраат и откако ќе заврши празничната гозба, можеби е време за консултација со лекар бидејќи можат да бидат рани знаци на рак на дебелото црево.

Необјаснет замор поголем од вообичаената поспаност

Божиќното време е раздвижено и нормално е да се чувствувате исцрпено по целодневно подготвување храна или гостување на семејството, но ако се борите со хроничен замор кој не поминува ни по одморот и ви е тешко да останете будни, вашето тело можеби се обидува да ви испрати порака.

Ракот на дебелото црево може да доведе до анемија. Губењето крв во цревата го намалува бројот на црвените крвни зрнца во телото, што резултира со хроничен замор. Ако овој симптом продолжи долго по празниците, важно е да побарате стручна помош.

Крв во столицата

Иако празничните намирници како цвеклото и слично можат привремено да ја обојат столицата во црвеникава боја, што е безопасно, вистинската крв во столицата никогаш не смее да се занемари.

Иако причината можат да бидат хемороиди или ситни пукнатини настанати при напрегање, упорното крвавење е клучен знак за предупредување за рак на дебелото црево. Немојте да го отпишувате овој симптом за време на празниците како еднократна појава предизвикана од тешка храна или алкохол – закажете преглед кај вашиот матичен лекар.

Брзо чувство на ситост

Лесно е да се прецени гладот пред богатата празнична трпеза, но ако се чувствувате необично сити по само неколку залаци, тоа би можело да укажува на посериозен проблем. Постојаното чувство на полност може да се јави ако во цревата постои блокада или тумор. Иако е примамливо да му се припише ова чувство на тешкиот божиќен оброк, внимателно следете го симптомот, особено ако не поминува или се влошува.

Повеќе од обични празнични грчеви

Прејадувањето често предизвикува чувство на надуеност и непријатност, но острата или упорна болка во стомакот е нешто што не смее да се игнорира. Ако болката е локализирана на едно место, не престанува откако дигестијата ќе си ја заврши работата или ве буди ноќе, тоа може да укажува на затнување или тумор во цревата.

Не го одложувајте одењето кај лекар за по празниците – клучно е што побрзо да се провери причината за каква било долготрајна болка во стомакот.