Симовски: Добри ни се шансите на ЕП, можеме до две победи!
Ексклузивно за „Слободен печат“ говореше еден од најдобрите македонски одбојкари и поранешен репрезентативец, Јовица Симовски пред настапот на нашата селекција на ЕП.
Симовски вели дека нашите најдобри одбојкари можат да направат добри резултати и на наредното Европското првенство 2019 година.
– Моите колеги веќе направија супер и голем резултат со самиот пласман на Европското првенство. Познавајќи ги, сигурен сум дека ќе направат уште поголем резултат и ќе се пласираат во наредната фаза на ЕП. Мислам дека на време почнаа да се спремаат и подготвени ќе заминат за самото натпреварување – ни изјави Симовски.
Воедно верува дека „црвено-жолтите“ имаат квалитет за прво позитивно претставување на нашата земја.
– Мислам дека можеме да направиме две победи. Според мене шансите треба да ги бараме против Турција и Белорусија. Исто така можеме и до позитивен резултат и против Финска. Се разбира, селекциите на Русија и Словенија се фаворити – додаде Симовски кој има богато интернационално искуство на клупски план во Франција и Белгија.
Потсетување дека евро шампионатот ќе го започне против селекција на Финска на 12 септември, а потоа редоследно против Турција, Русија, Белорусија и домаќинот Словенија во Љубљана.
Првопласираните четири ќе се најдат во осминафиналето, првиот со четвртиот, вториот со третиот, и обратно, а вкрстуваме со групата Д каде што се Чешка, Естонија, Црна Гора, Холандија, Полска и Украина.