Физичката активност, во комбинација со правилна исхрана, е основа за добро здравје и виталност – без разлика на возраста. Соодветниот баланс на протеини и јаглехидрати обезбедува доволно енергија за време на тренингот и помага да се постигнат подобри резултати. Честото прашање е: дали е подобро да се јаде пред или по вежбање?

Стручњаците се согласни дека ниту празен ниту преполн стомак не е добра опција пред тренинг. Ако не јадеме ништо, може да почувствуваме слабост и недостаток на енергија. Ако, пак, претераме со оброкот, постои ризик од непријатност и мачнина, пишува „Е-клиника“.

Идеално е да се внесе лесен и здрав оброк 30 минути до два часа пред вежбање, но важно е секој да ги следи сигналите на сопственото тело.

„Некои луѓе не можат да јадат пред тренинг бидејќи чувствуваат мачнина, додека други мора да внесат храна затоа што во спротивно се чувствуваат слабо“, објаснува нутриционистката Бони Тауб – Дикс.

Според неа, најважно е да откриете што вам лично ви одговара.

Нутриционистите препорачуваат оброк кој содржи лесно сварливи состојки, со добра рамнотежа на протеини и јаглехидрати.

Примери за оброк пред тренинг:

• банана;
• смути со зеленчук и протеински извор;
• грчки јогурт со јаткасти плодови;
• интегрален тост со сирење.

Франсис Ларџмен-Рот советува оброк околу еден час пред тренинг, додека Тауб-Дикс препорачува период од 30 минути до два часа. Ако немате време, може да послужи и банана или енергетска плочка.

Препораката е ужината да содржи 200 до 250 калории – доволно за енергија, но без оптоварување на желудникот. Не смее да се заборави и внесот на вода.

По вежбањето, телото започнува процес на регенерација. Протеините се клучни за обновување на мускулите, а јаглехидратите помагаат да се надоместат резервите на гликоген.

Ларџмен-Рот препорачува оброк 15 до 20 минути по тренингот, со комбинација од јаглехидрати, протеини, здрави масти, антиоксиданси.

Примери за оброк по тренинг:

• чинија јогурт со јаткасти плодови и свежо овошје;
• интегрален мафин со авокадо;
• овесна каша со младо сирење, јаткасти плодови и овошје.

Овие комбинации обезбедуваат хранливи материи што телото ги губи за време на физичката активност и го забрзуваат закрепнувањето.

Заклучокот на експертите е јасен: најважно е да го слушате сопственото тело и да најдете ритам што ви одговара. Правилно избалансираната ужина пред и по тренинг може значително да го подобри ефектот од вежбањето и да ви помогне да се чувствувате посилно и поенергично.

Нутриционистка Емилија Спасовска Мојсовска: Здрава исхрана за зафатени луѓе – практични совети што функционираат