Денеска, на 20 јули, се навршуваат 53 години од смртта на Брус Ли – легендарниот актер, мајстор на боречки вештини и филмски визионер кој засекогаш го промени акциониот жанр. Иако живееше само 32 години, остави наследство што и денес инспирира милиони луѓе ширум светот.

Ѕвездата на филмовите „Големиот шеф“ (The Big Boss), „Тупаница на бесот“ (Fist of Fury), „Патот на змејот“ (The Way of the Dragon) и „Влез на змејот“ (Enter the Dragon) беше многу повеќе од актер. Тој ја создаде филозофијата „Џит Кун До“, ги урна стереотипите за азиските актери во Холивуд и стана една од највлијателните личности во популарната култура.

Стана симбол на две култури

Брус Ли е роден на 27 ноември 1940 година во Сан Франциско, каде што неговите родители привремено престојувале поради турнеја на неговиот татко, кој бил познат кантонски оперски актер. Само неколку месеци подоцна семејството се вратило во Хонг Конг, каде што Ли го поминал детството и уште како мало момче започнал да се појавува во филмови.

Во тинејџерските години често влегувал во улични тепачки, поради што родителите го испратиле во САД. Таму студирал на Универзитетот во Вашингтон, почнал да предава боречки вештини и ја запознал својата животна сопатничка, Линда Емери, со која подоцна добил две деца – Брендон и Шенон.

Неговата телевизиска улога на Като во серијата „Зелениот стршлен“ (The Green Hornet) му ја отвори вратата кон американската публика, но вистинската светска слава ја доживеа по враќањето во Хонг Конг. Само неколку филмови беа доволни за да стане глобална сензација и човекот кој го популаризираше кунг-фу филмот низ целиот свет.

Мистериозна смрт

На 20 јули 1973 година, додека работел на филмот „Игра на смртта“ (Game of Death), Брус Ли добил силна главоболка, земал лек против болки и легнал да одмори. Неколку часа подоцна не можеле да го разбудат, а во болница било констатирано дека починал. Имал само 32 години.

Официјалната истрага тогаш заклучила дека причината за смртта била мозочен едем, но со децении се појавуваа различни теории – од алергиска реакција на лекови, преку топлотен удар, па сè до понови медицински анализи кои укажуваат на можни нарушувања на нивото на натриум во организмот. Поради тоа, неговата смрт и денес останува една од најголемите мистерии во светот на филмот и спортот.

Иако неговата кариера траеше само неколку години, влијанието на Брус Ли е огромно. Денес се смета за татко на модерниот пристап кон боречките вештини, а неговите идеи за дисциплина продолжуваат да инспирираат спортисти, актери и љубители на боречките спортови низ целиот свет.

Легендарниот Брус Ли е починат на денешен ден: Заспал во креветот на љубовницата и веќе не се разбудил