Повеќето луѓе знаат дека за време на големите горештини треба да избегнуваат директно изложување на сонце и да пијат многу вода. Но, ако сѐ уште не сте ја прилагодиле исхраната на високите температури, можеби сега е вистинскиот момент.

За време на топлотен бран, правилната исхрана може да помогне да се одржи нивото на енергија, да придонесе за подобра хидратација и значително да влијае на тоа како се чувствуваме, пишува британскиот „Телеграф“.

Нутриционистите затоа препорачуваат шест видови намирници кои треба да имаат предност во исхраната за време на жешките денови, како и намирници што е подобро да се избегнуваат.

1. Избирајте намирници што хидрираат

Во текот на жешките денови телото се поти повеќе за да се разлади. Доколку не ја надоместите изгубената течност, брзо може да почувствувате симптоми на дехидратација – намалена концентрација, ментален замор, главоболка, раздразливост и поспаност.

Освен што треба да пиете повеќе вода, корисно е да јадете и намирници богати со вода, кои помагаат да се надомести течноста изгубена со потењето. Всушност, околу една петтина од вкупниот дневен внес на течности доаѓа токму преку храната.

Голем број растителни намирници содржат високо количество вода. Краставицата, на пример, содржи дури 96 проценти вода, повеќе од која било друга намирница, додека доматот содржи околу 95 проценти.

Јагодите, дињата, печурките, портокалите и шумското овошје исто така придонесуваат за подобра хидратација, а воедно се нискокалорични и богати со витамини и растителни влакна.

2. Внесувајте природни извори на електролити

Со потењето не губиме само течности, туку и електролити, кои имаат клучна улога во одржувањето на рамнотежата на течностите и правилната работа на мускулите.

Електролитите се минерали кои, кога се раствораат во вода, носат електричен полнеж и учествуваат во регулирањето на бројни функции во организмот, меѓу кои се рамнотежата на течностите и преносот на нервните импулси.

Тие се важни за мускулните контракции, регулирањето на крвниот притисок, функционирањето на клетките и создавањето енергија. Затоа, кога сме дехидрирани, концентрацијата значително се намалува.

Иако додатоците во прав со електролити станаа многу популарни и можат да бидат корисни при интензивно потење, како на пример за време на вежбање, нутриционистите советуваат тие првенствено да се внесуваат преку природна храна.

На тој начин, покрај минералите, внесувате и растителни влакна, витамини и антиоксиданси, а ризикот од прекумерен внес на електролити е помал.

Авокадото, бананите и доматите се богати со калиум и магнезиум, додека гравот ги содржи двата минерали, како и калциум.

Преливот за салата од сок од лимон, маслиново масло и морска сол исто така придонесува за внес на калиум, калциум и магнезиум, кои се особено важни за луѓето што често имаат грчеви.

3. Грицкајте храна што може да помогне во заштитата на кожата

Одредени намирници можат да обезбедат одреден степен на природна заштита од ултравиолетовото зрачење. Секако, тоа не е замена за крем со заштитен фактор, но познато е дека лубеницата содржи антиоксиданс ликопен, кој помага во неутрализирањето на слободните радикали што се создаваат при изложување на УВ-зраци.

Според некои истражувања, сличен ефект имаат и полифенолите од зелениот чај.

Затоа, за време на горештините освежете се со парче лубеница или додајте ја во салата, а во текот на денот пијте зелен чај. Ако не сакате топол напиток, оставете го да се излади и послужете го со мраз.

4. Одбирајте ладни оброци

Вклучувањето на рерната или шпоретот дополнително го загрева домот, па затоа се препорачуваат свежи салати и други јадења што не бараат термичка обработка.

Денес постојат и многу здрави конзервирани намирници, како варена наут, готова киноа, леќа и различни видови риба.

Од нив, во комбинација со краставици, домати и зелени лиснати салати, лесно и брзо може да подготвите лесен летен оброк.

5. Пробајте чај од нане

Ако имате чувство дека устата ви се разладува по консумирање нане, тоа не е само впечаток.

Нането природно создава чувство на свежина бидејќи содржи ментол, кој ги активира рецепторите за студ во устата.

Истражувањата покажуваат дека ментолот ги активира истите рецептори што се вклучуваат кога сме изложени на ниски температури. Иако самиот не е студен, организмот реагира како навистина да е.

6. Топли напитоци и покрај жештините

Иако звучи необично, топлите напитоци можат да помогнат за време на топлотен бран.

Пиењето топол напиток го поттикнува потењето, а токму потењето е еден од главните механизми преку кои телото се разладува.

Сличен ефект може да има и лутата храна. Капсаицинот од лутите пиперки, како и изотиоцијанатите од ренот и сенфот, го „измамуваат“ нервниот систем да мисли дека телото е уште потопло, со што се поттикнува потење и последователно ладење.

Ако сакате да готвите без дополнително да го загревате домот, искористете го убавото време за скара.

Маринирајте месо или зеленчукови ражничи во лут прелив, а послужете ги со домашна салата од компири. Додадете и зеленчук богат со вода за да останете хидрирани и да го олесните варењето.

Што треба да избегнувате?

Нутриционистите предупредуваат дека за време на големите горештини одредени намирници можат дополнително да го оптоварат организмот.

Пред сѐ, треба да се избегнува ултрапреработената храна, бидејќи содржи многу сол, а малку вода, што може да придонесе за дехидратација. Во такви услови организмот извлекува вода од клетките, со што дополнително се зголемува ризикот од дехидратација.

Исто така, не се препорачуваат ниту многу обилни оброци. Кога јадеме тешка храна, телото троши повеќе енергија за варење, при што создава дополнителна топлина. Многу подобро е да се јадат помали, но почести оброци.

Засладените пијалаци и слатките исто така не се најдобар избор.

„Газираните и засладените пијалаци, како и сладоледите на стапче, брзо го покачуваат нивото на шеќер во крвта, по што следува нагол пад, поради што подоцна ќе чувствувате уште поголема жед.“

За да се ублажи овој ефект, нутриционистите препорачуваат десертите да се јадат веднаш по главниот оброк или да се избираат поздрави алтернативи.

Сепак, и со таквите намирници не треба да се претерува, па одвреме-навреме слободно можете да се почестите со сладолед – омиленото летно освежување за многумина.

Рецепт за сладолед од лубеница — има нула калории