Лесно е да се претпостави дека секоја намирница на која ѝ истекол рокот на траење автоматски треба да заврши во ѓубре. Сепак, во реалноста многу пакувани производи можат да бидат безбедни за употреба и по датумот наведен на амбалажата, особено ако се правилно чувани, бидејќи тие датуми најчесто се однесуваат на квалитетот, а не секогаш на безбедноста, пишува „Индекс“.

Но постојат намирници кај кои не смее да се прави компромис, бидејќи брзо можат да станат погодна средина за развој на штетни бактерии, па нивната консумација носи сериозен ризик.

Експерти за безбедност на храна објаснуваат кои намирници по истекот на рокот секогаш треба да се фрлат.

Меки сирења и млечни производи

Меките сирења како бри, моцарела и козјо сирење, како и другите млечни производи со истечен рок, треба да се фрлат дури и ако немаат непријатен мирис или видливи знаци на расипување.

Според научниците за храна, овие производи можат да содржат опасни микроорганизми како ешерихија коли, салмонела и листерија, кои можат да предизвикаат болест дури и во мали количини, особено кај лица со ослабен имунитет.

Истражувањата покажуваат дека и најдобрите методи на пакување, како вакумирање, само минимално го продолжуваат рокот на траење на меките сирења. Тие се особено чувствителни на промени на температурата.

Дополнителен ризик претставува чувањето во вратата од фрижидерот, каде температурата често варира. Експертите предупредуваат дека храната треба што помалку време да поминува во таканаречената „опасна зона“ од 5 до 60 степени Целзиусови, каде бактериите брзо се размножуваат.

Месо и морски плодови

Иако правилното складирање на месо и морски плодови може да го забави развојот на бактерии, тоа не значи дека тие се безбедни по истекот на рокот.

Истражувањата покажуваат дека ниту пакувањето ниту ладењето не го запираат целосно растот на бактерии, особено кај црвеното месо.

Кај морските плодови и рибата ризикот е уште поголем. Научни студии укажуваат дека само замрзнувањето може сигурно да го продолжи нивниот рок на употреба, додека обичното ладење не е доволно за долгорочно чување.

Поради тоа, експертите препорачуваат овие намирници да се фрлат кратко по истекот на рокот, бидејќи се високоризични за развој на бактерии и токсини.

Варен ориз и тестенини

Варениот ориз и тестенините можат да бидат изненадувачки ризични ако се чуваат подолго време, особено ако полека се ладеле или стоеле на собна температура пред да се стават во фрижидер.

Одредени бактерии, како бацилус цереус, можат да преживеат готвење и да останат во скробната храна, каде во поволни услови се размножуваат и создаваат токсини кои не се уништуваат секогаш со повторно подгревање.

Експертите предупредуваат дека влагата во овие намирници, заедно со бавното ладење и чувањето во поголеми количини, создава идеални услови за развој на бактерии.

Затоа, ваквата храна не треба да се чува предолго по подготовката, дури и ако изгледа и мириса нормално.

7 намирници со пократок рок на траење отколку што мислите