Денеска во Приштина, Косово, фудбалерите на Шкендија ќе го играат својот четврти натпревар оваа сезона во Конференциската лига, а противник им е тимот на Дрита.

Мечот ќе се игра на стадионот „Фадил Вокри“ во Приштина со почеток од 21.00 часот, а главен судија е Микел Редер од Данска.

Играчите предводени од тренерот Јетон Беќири имаат учинок од една победа против ирскиот Шелбурн (1:0), реми со полската Јагелонија (1:1) и пораз од шпанскиот Рајо Ваљекано (2:0).

Моментно тетовските „црвено-црни“ се на 21 позиција со четири бодови и со евентуален триумф над Дрита ќе ги зголемат своите шанси за пласман во нокаут-фазата.

– Ќе биде празничен натпревар, ќе биде вистински спектакл и на трибините и на теренот. Уверен сум дека и тимот на Дрита и нашиот тим се подготвени да го дадат својот максимум. Тоа е натпревар од особено значење, бидејќи се среќаваме во европски натпреварувања, поточно во Конференциската лига. Верувам дека тимот е подготвен да го даде својот максимум, почитувајќи го тимот на Дрита максимално. Се надеваме дека со давање на нашиот максимум и постигнување на нашите најдобри перформанси, се надеваме дека ќе дојдеме до позитивен резултат, а позитивен резултат за нас е победа – рече тренерот на актуелниот македонски шампион, Беќири, пред денешниот дуел со Дрита.

Добри вести за Беќири е што голманот Бабукар Гаје се опорави и ќе биде подготвен за настап, како и напаѓачот Фабрис Тамба и дефанзивците Клисман Цаке и Имран Фетаи.