Големо шише шампањ „Дом Перињон“, таканаречен „Магнум“ од 1961 година, кое требало да се послужи на свадбата на принцезата Дијана и принцот Чарлс, со проценета вредност помеѓу 67.000 и 80.000 евра, ќе биде понудено на аукција во Данска на 11 декември, пренесуваат странските медиуми.

– Ова е уникатно и многу посебно откритие. Постојат само 12 такви „Магнуми“, а ова шише е едно од нив – рекол раководителот на винаријата во Брун Расмусен, Томас Розендал Андерсен, презентирајќи го ова ретко шише шампањ.

Според него, шишето, кое моментално се чува во приватна визба за алкохол, би можело да привлече и љубители на вино и колекционери кои бараат кралски спомени.

 

View this post on Instagram

 

A post shared by Bruun Rasmussen Auctioneers (@bruunrasmussen)

– Купувачот би можел да биде класичен колекционер на вино кој би уживал додавајќи го ова шише во својата колекција, но и колекционер на кралски предмети поврзани со Леди Дијана – рекол Розендал Андерсен.

Според него, за овој тип ретки шишиња со пијалаци се спроведуваат неколку тестови, вклучително и палење на шишето за да се провери дали содржината има убава, бистра боја.

– Сегашниот сопственик на „Магнум“, колекционер кој сака да остане анонимен, го купил ова шише од лондонски дилер. На аукција во 2008 година, американската аукциска куќа „Херитиџ аукшнс“ го продала овој „Магнум“ за околу 12.000 долари. Ова шише ќе биде понудено повторно на аукција што ќе се одржи на 11 декември во Конгенс Лингби, предградие на Копенхаген – додал Розендал Андерсен.

Овој шампањ, берба од 1961 година, годината на раѓање на Дијана, бил етикетиран за нејзината свадба со принцот Чарлс, која се одржала на 29 јули 1981 година.

Се проценува дека овој „Дом Перињон“ ќе достигне цена помеѓу 500.000 и 600.000 круни (помеѓу 67.000 и 80.000 евра) на аукцијата.

– Шампањот е апсолутно питок. Сите шишиња вино што ги продаваме на аукција се тестираат и анализираат однапред – заклучил тој.