Претседателот на Асоцијацијата на земјоделци, Ефтим Шаклев, вели дека во моментов и покрај кризата со корона вирусот воопшто не намален интересот за увоз на македонско јагне од италијанска страна, но, треба добро да се проанализираат условите како тоа ќе се спроведе зашто, веројатно, трошоците за пласман ќе се зголемат.

– Најголеми количини извезуваме во Италија. Во овој момент, не е проблем да се најдат трговци, туку транспортери зашто никој не сака да се нафати да вози за Италија, ќе треба потоа да оди во карантин. Но, ако се земат предвид најновите владини мерки кои се однесуваат и на возачите на камиони и ако се воведе тој посебен режим за нив, работата би се олеснила. Како и да е, ова мора итно да се реши. Извозот веќе интензивно требаше да почне, зашто остануваат уште 10 до 15 дена до извозниот шпиц – истакнува Шаклев.

Во просек, земјава секоја година извезува по околу 200.000 јагниња годишно за Италија. Втори, но далеку помали пазари се Хрватска и Грција. Вообичаено шпицот на пласманот е пред или за време на велигденските празници.