Седлоски: Против Санта Клара треба да бидеме трпеливи и паметни
В четврток од 20.00 часот составот на Шкупи ќе го игра првиот натпревар од второто квалификациско коло во Конференциската лига против Санта Клара од Португалија на Националната арена „Тодор Проески“ – Скопје.
Клубот од Чаир успешно стартуваше во новоформираното натпреварување на УЕФА откако го елиминираше претставникот на Косово, Лапи (2:0, 1:1).
Прес конференција одржија тренерот Гоце Седлоски и капитенот на Шкупи, Фатих Исмаили кои веруваат во позитивен резултат во првите 90 минути со Санта Клара.
Седлоски вели дека неговите играчи мора да бидат сериозни и внимателни против португалската екипа:
– Треба да бидеме трпеливи, да бидеме паметни и покажеме добра игра, и ги израдуваме нашите навивачи со победа. Пред нас имаме многу силен противник, тие играат брз, агресивен и напаѓачки фудбал, но секако имаме и многу што да покажеме на утрешниот натпревар.
Го анализиравме ривалот кој има одлични играчи, но резултатот ќе зависи од нашата игра – рече Седлоски.
Исмаили ветува дека тимот ќе го даде максимумот во обидот да остварат позитивен резултат пред реванш мечот:
– Максимално сме подготвени за утрешниот натпревар. Играме против прилично добар тим како Санта Клара. Веруваме дека утре, давајќи го максимумот, ќе дојдеме до позитивен резултат и ќе им донесеме радост на нашите навивачи – се зборовите на Исмаили.