Кремљ ги отфрли тврдењата на пет европски земји дека рускиот опозициски лидер Алексеј Навални бил убиен во руски затвор во 2024 година со токсин од отровна жаба.

Портпаролката на руското Министерство за надворешни работи, Марија Захарова, за државната новинска агенција ТАСС изјави дека обвинувањата се „дезинформациска кампања од страна на Западот“.

„Резултатите од анализите ќе бидат објавени, формулите на супстанцијата ќе бидат познати – потоа ќе има коментари. Без тоа, сите разговори и изјави се информативна кампања насочена кон одвлекување на вниманието од итни проблеми на Западот“, рече таа.

 

 

Слична порака испрати и руската амбасада во Обединетото Кралство.

„Ова не е потрага по правда, туку исмејување на починатиот. Дури и по смртта на руски државјанин, Лондон и европските престолнини не можат да му дадат мир, што многу кажува за поттикнувачите на оваа кампања“, се вели во соопштението на руската амбасада.

Владите на Германија, Велика Британија, Франција, Шведска и Холандија денес објавија дека Навални е убиен од руската држава користејќи моќен отров.

Земјите рекоа дека анализите на останките на Навални покажале траги од исклучително моќниот токсин епибатидин и ја обвинија Москва за убиство на непријателот на рускиот претседател Владимир Путин.

Смртта на Навални во февруари 2024 година предизвика меѓународна осуда и обвинувања од западните влади дека Кремљ е одговорен. Москва постојано негираше вмешаност во неговата смрт.