Американскиот државен секретар Марко Рубио одби да каже дека на Израел ќе му треба „дозвола“ од САД за да ги обнови борбите против Хамас во Газа ако групата продолжи да претставува закана, нагласувајќи дека американскиот план за прекин на огнот има широка регионална поддршка и е „најдобриот“ и „единствениот план“, јави „Тајмс оф Израел“.

На прашањето на прес-конференцијата во координативниот центар за прекин на огнот меѓу САД и Израел дали Израел може да продолжи со борбата против Хамас независно од групата што се вооружува или прегрупира, Рубио истакна дека „не е убеден дека ова има врска со дозвола за таков чекор или нешто од таа природа.

-Ова има врска со тоа што во основа сите сме посветени на тоа овој план да функционира. Нема план Б. Ова е најдобриот план. Тоа е единствениот план. Тоа е план за кој мислиме дека може да успее. Тоа е план за кој веруваме дека е на пат кон успех“, истакна тој.

Како одговор на друго прашање за разоружувањето на Хамас, Рубио нагласува дека „доколку Хамас одбие да се демилитаризира, тоа ќе биде прекршување на договорот и тоа ќе мора да се спроведе без оглед на се.

-Ова е договор, а договорот бара исполнување на услови. Израел ги исполни своите обврски. Тие стојат на жолтата линија, а тоа зависи од демилитаризацијата – изјави Рубио.

Американскиот државен секретар забележува дека разоружувањето на Хамас и демилитаризацијата на Газа во рамките на втората фаза од договорот „е долгорочен проект“.

-Сакаме да помогнеме во создавањето услови тука за луѓето во Газа да не мора да бидат тероризирани од Хамас и всушност, да имаат животи, работни места, бизниси и подобра иднина – истакна тој.