Американскиот сценарист Роџер Алерс, кој беше еден од режисерите на анимираниот класик „Кралот лав“ (The Lion King) од 1994 година, почина на 77-годишна возраст. Веста ја потврди неговиот долгогодишен пријател и супервизор за визуелни ефекти, Дејв Босерт.

Во објава на Фејсбук, Босерт напиша дека е длабоко ожалостен од веста за смртта на Алерс, додавајќи дека само неколку дена претходно разменувале електронска пошта додека Алерс патувал низ Египет. Тој го опиша како исклучително талентиран уметник и филмаџија, и како еден од столбовите на ренесансата на анимацијата на „Дизни“.

Алерс беше сорежисер на „Кралот лав“ заедно со Роб Минкоф. Со гласовните улоги на Метју Бродерик, Џереми Ајронс и Џејмс Ерл Џонс, филмот се смета за еден од најдобрите и највлијателни наслови во историјата на студиото. Оригиналната кино-верзија оствари глобална заработка од 771 милион долари, додека преработката од 2019 година надмина 1,6 милијарди долари и се вбројува меѓу најкомерцијално успешните филмови на сите времиња.

Во својата објава, Босерт се осврна и на богатата кариера на Алерс во „Дизни“. Тој ја започнал својата професионална патека работејќи на концепти за продукцијата на „Трон“ (Tron), а потоа како сториборд-уметник на филмови како „Оливер и компанија“ (Oliver & Company) и „Малата сирена“ (The Little Mermaid). Подоцна станал раководител на приказната за „Убавицата и ѕверот“ (Beauty and the Beast), пред да го сорежира „Кралот лав“.

Според Босерт, и покрај огромниот успех, Алерс останал исклучително скромен, однесувајќи се со љубезност и почит кон сите, без оглед на нивната позиција. Особено ја истакна нивната соработка на филмот „Девојчето со кибритчиња“ (The Little Matchgirl), опишувајќи ја како вистинска радост и инспирација за сите вклучени.

Почит кон делото и ликот на Алерс оддаде и извршниот директор на „Дизни“, Боб Ајгер, преку објава на Инстаграм. Тој го опиша како креативен визионер чии придонеси ќе живеат со генерации, нагласувајќи дека Алерс длабоко ја разбирал моќта на доброто раскажување приказни и начинот на кој незаборавните ликови, емоциите и музиката можат да се спојат во нешто безвременско. Ајгер изрази сочувство до семејството, пријателите и соработниците на Алерс, истакнувајќи дека неговото наследство ќе продолжи да инспирира публика ширум светот.

ВИДЕО | „Ова е тежок непотизам“: Изборот на една актерка во „Кралот Лав“ ги налути обожавателите