Античкиот амфитеатар во Верона, стар околу две илјади години и постар дури и од Колосеумот, ќе стане целосно достапен за лица со попреченост пред почетокот на Зимските Параолимписки игри „Милано–Кортина 2026“. Со сто дена до почетокот, организаторите најавуваат дека ова е еден од најважните инфраструктурни зафати кој ќе остави трајно наследство и по завршувањето на игрите, пишува „Гардијан“.

Амфитеатарот ќе биде домаќин на церемонијата на отворање на Параолимписките игри, а адаптациите вклучуваат поставување лифт и нови санитарни јазли, интервенции што предизвикаа бурни реакции во Италија.

Извршниот директор на организацијата „Милано–Кортина 2026“, Андреа Варниер, вели дека дел од јавноста ги смета овие зафати за „светогрдие“ врз античкиот споменик, но дека промените се неопходни.

„Одлуката да ја одржиме церемонијата во Арената не е само заради убавината. Целта е да ја направиме достапна – не само самата арена, туку и патеката од железничката станица до местото на одржување. За некого лифт во римски амфитеатар е неприфатлив, но времињата се менуваат. Ова е силна порака за инклузија“, изјави Варниер.

Вкупната вредност на реконструкцијата изнесува 20 милиони евра, а проектот претставува столб на параолимпиското наследство, заедно со подобрување на пристапниот јавен превоз и нови програми за едукација и развој на зимските параспортови.

Организаторите најавија и поприроден пристап кон создавање вештачки снег: без употреба на хемиски адитиви.

„Климатските промени ја прават технологијата за снег особено важна. Новиот систем користи само вода, без штета врз локалниот екосистем“, објасни Варниер.

На Зимските Параолимписки игри ќе настапат спортисти од 50 земји во шест дисциплини: алпско скијање, биатлон, нордиско скијање, хокеј на мраз, сноуборд и керлинг во инвалидска количка. Иако организаторите не ги откриваат бројките за продадени билети, признаваат дека интересот традиционално доаѓа по завршувањето на Олимписките игри.

„Жално е што вниманието секогаш прво оди кон Олимпијадата, но тоа е повторувачки образец. И покрај тоа, имаме целосна доверба дека заинтересираноста ќе порасне,“ вели Варниер.

За Варниер, успехот на Игрите не се гледа само низ бројките, туку и низ трајните промени што ќе останат во регионот.

„Во голема мера, Игрите веќе се успех поради наследството што ќе го оставиме. Ова е уште една тула во растот на параолимпиското движење,“ нагласува тој.

И покрај комплексноста на зимските параспортови и предизвиците што ги носат климатските и инфраструктурните услови, организаторите веруваат дека „Милано–Кортина 2026“ ќе биде чекор напред кон поголема достапност, еднаквост и видливост за спортистите со попреченост.