Ретка фотографија од Кирил Поп Христов – Кили и Владимир Ендровски – Љац се појави на социјалните мрежи, а на неа актерите се дел од ѕвездена екипа со своите колеги од времето кога дипломирале на ФДУ.

Насловната страница на некогаш најпопуларното списание „Екран“, со наслов „Дипломци“, открива дел од генерацијата, меѓу кои се и Тања Кочовска, Валентина Божиновска, Драган Спасов – Дац и Ѓорѓи Јолевски.

На фотографијата е и актерот Владимир Ендровски – Љац, кој, за жал, повеќе не е меѓу живите. Тој почина на 20 август 2023 година, на 60-годишна возраст.

Познатиот македонски актер Кирил Поп Христов – Кили почина на 11 март во Еквадор. Тој се пресели во јужноамериканската држава во 2014 година со своето семејство – сопругата Гордана и ќерките. И покрај преселбата, повремено се враќаше во Скопје и одржуваше контакт со пријателите и колегите од театарската и филмската сцена.

Со силна сценска енергија и препознатлива харизма, Кили беше еден од оние актери кои уште од своите дипломски денови ветуваа многу. За жал, неговиот живот заврши прерано, оставајќи празнина на македонската театарска и телевизиска сцена, но и силно наследство што продолжува да живее преку неговите улоги.

Кили ќе биде погребан во Еквадор, земјата во која помина значаен дел од својот живот. Неговото почивалиште е во Мангларалто, покрај океанот, откри за „Викимедија“ неговата сопруга, кореографката и професорка по современ танц Гордана Деан Поп Христова.

Токму оваа фотографија, на која Кили е заедно со своите колеги од генерацијата, останува сведоштво за еден млад бран актери што подоцна ќе ја одбележат македонската сцена. Кили и Љац потекнуваат од генерација дипломци која ќе стане столб на современото македонско актерство.

ФОТО | Емотивен спомен од помладите денови: Тања Кочовска се прости од Кили