Тимот на Ред Бул ќе мора да плати казна од 50.000 долари поради инцидент што се случил непосредно пред почетокот на трката за Големата награда на САД, кој, според официјалните лица, претставува сериозно прекршување на правилата, а не само обично недоразбирање.

Како што пренесуваат странските медиуми, еден член од австрискиот тим се обидел да се врати на стартната решетка за време на загревачкиот круг, и покрај тоа што експлицитно му било наредено дека тоа не смее да го направи. Истрагата подоцна открила и зошто сакал да го направи тоа, тој се обидел да ја отстрани визуелната ознака што тимот на Мекларен ја поставил на патеката за Ландо Норис, за подобра ориентација при позиционирањето на болидот пред стартот.

Оваа ознака, поставена точно во висина на визирот на шлемот на Норис, служела како референтна точка за тој да го заземе идеалното место на стартната линија. Намерата на членот на Ред Бул, очигледно, била да му го отежне тој процес што беше протолкувано како обид за саботажа.

Иако камерите задолжени за ТВ-преносот не го фатија моментот, доказите беа пронајдени преку безбедносните камери поставени околу патеката, по што следеше и официјалната санкција.

Преземено од: Спорт.ком.мк