Ако сте останале без идеи за појадок, вистински појадок, а не нешто од фурна на пат кон работа, ви даваме три брзи рецепти за првиот оброк во денот поради кој со задоволство ќе станувате од креветот.

Заедничко за овие појадоци е тоа што се готови за само 5 минути, а се здрави и заситувачки, па сигурно ќе ве држат сити до ручек. Без разлика дали ќе изберете солено или слатко, течно или крцкаво – зависи од вас.

1. Тост со авокадо и јајце

Тост со авокадо и поширано јајце е најпопуларниот појадок бидејќи е многу вкусен, а најдобро е што можете сами да го подготвите многу лесно. Притоа воопшто не мора да се заморувате со поширањето – еднакво вкусно ќе биде и јајцето на око или меко варено.

Некој добар интегрален леб со семки или цели зрна ќе го направат и тостот поинтересен. Авокадото треба да е зрело, но не презрело, а за зелениот намаз ќе ви треба само виљушка и малку зачини. Тостот можете да го збогатите со тенко парче домат, чаден лосос или пршута.

Состојки:

– ¼ авокадо
– ¼ лажичка мелен бибер
– ⅛ лажичка лук во прав
– 1 парче леб од цело зрно, препечен или тостиран
– 1 големо јајце, печено или поширано
– сок од 1 лимета

Подготовка:

Авокадото, биберот, лукот во прав и сокот од лимета ставете ги во помал сад и нежно изгмечете ги со виљушка.
Јајцето пропржете го или сварете го, по потреба исечете го.
Препечете го лебот, намачкајте го со намазот од авокадо и одозгора ставете го јајцето.

2. Овесна каша со јаболка и цимет

Овој појадок не само што е лесен и готов за помалку од 5 минути, туку воопшто не мора да го подготвувате наутро. Овесната каша подгответе ја навечер, без готвење, а наутро ќе треба само да ја промешате, да ја засладите и да ја изедете.

Ќе ви даде доволно енергија за сите дневни предизвици, а има вкус на колач. За малку крцкавост и сладост, додајте една лажица од омилената гранола, а за помалку слатка варијанта само измешајте ореви. Подготвената каша со јаболка и цимет можете да ја чувате во фрижидер 2 до 3 дена, па овој вкусен појадок можете да го јадете неколку денови.

Состојки:

– ½ чаша овесни снегулки
– ½ шолја бадемово млеко
– 1 јаболко, исечено на коцки
– малку сок од лимон
– ⅛ лажичка цимет
– 1 лажица крупно дробени ореви или гранола
– 1 лажичка мед (или по вкус)

Подготовка:

Ставете ги овесните снегулки во стаклен сад и прелијте ги со млеко.
Сечканото јаболко посипете го со малку сок од лимон, посипете со цимет и додајте го во садот со кашата.
Оставете во фрижидер преку ноќ.
Наутро посипете со јаткасти плодови или гранола и засладете со малку мед.

3. Смути од боровинки

Смутито од боровинки е супер хранлив и многу вкусен појадок или ужина што ќе им се допадне на сите што не сакаат класичен појадок, но затоа сакаат – сладолед. Тајната состојка сигурно ќе ве изненади – замрзнат карфиол! Нема да го почувствувате, но на вашето смути ќе му додаде повеќе витамини и ќе му даде прекрасна кремаста текстура.

И овошјето и зачините, секако, можете да ги менувате по сопствен вкус. Експериментирајте со млад спанаќ, грчки јогурт, семе од чија, мелени бадеми или свежо овошје.

Состојки:

– 1 ½ шолја замрзнати боровинки или мешано шумско овошје
– 1¼ шолја бадемово млеко, плус повеќе по потреба
– 1 шолја парчиња карфиол, замрзнати
– 1 банана, замрзната
– 2 лажици путер од кикиритки
– 1 лажица мед
– 1 лажица свеж сок од лимон
– парче свеж ѓумбир, по желба

Подготовка:

Во блендер ставете ги боровинките, бадемовото млеко, карфиолот, бананата, путерот од кикиритки, медот, сокот од лимон и ѓумбирот и матете додека смутито не стане кремасто. По потреба додајте уште млеко.
Послужете во чаша или сад и уживајте.