Оризот е едногодишно растение, житарка од фамилијата треви што потекнува од тропските и суптропските предели на Азија и Африка. Се одгледува на значително големи површини и во Македонија, најмногу во долината на Брегалница во Кочанската Котлина, а во помал обем и во долините на Тополка и Бабуна во Велешко.

Нутриционистите најчесто за исхрана го препорачуваат кафеавиот ориз затоа што не му се вади обвивката од јадрото на зрното, што прави зрното да има уникатен вкус, но е потешко за џвакање. Се вари двапати подолго од белиот ориз. Белиот ориз, од друга страна, е поделикатен и мек, но ги нема хранливите својства како кафеавиот.

Во јапонската кујна е често застапен, особено во комбинација со вкусен зеленчук и многу билки и зачини. Ви откриваме како да подготвите еден од нивните традиционални рецепти.

Состојки:

– 300 грама ориз
– 1 домат
– половина црвена пиперка
– половина жолта пиперка
– 1 кромид
– 100 грама боранија
– 50 грама пченка
– неколку лажици маслиново масло
– сол, бибер
– сос од соја
– свеж магдонос

Подготовка:

Сварете го оризот во солена вода според упатствата на пакувањето. Измијте ги боранијата, црвената пиперка, жолтата пиперка, доматот и младиот кромид. Потоа исечкајте го целиот зеленчук на коцки и пржете неколку минути на малку масло, сол и бибер во вок или во голема тава. Додајте неколку капки сос од соја и малку сок од лимета.

Потоа, додајте го сварениот ориз и добро промешајте за да се соединат вкусовите.

Послужете веднаш додека е топло и додајте малку свеж магдонос одозгора.

Добар апетит!