Поранешниот каталонски сепаратистички лидер Карлес Пуџдемон денес побара од Уставниот суд на Шпанија да го укине налогот за апсење издаден против него од Врховниот суд, дозволувајќи му да се врати во земјата без ризик од затвор.

Одбраната на Пуџдемон тврдеше дека одржувањето на налогот во сила откако и Уставниот суд и мислењето на генералниот адвокат на Европската Унија го потврдија законот за амнестија би претставувало „непоправлива штета што би го направило неефикасно“ неговото барање за уставна заштита, објави шпанскиот весник „Ла Паис“.

Пуџдемон и други лидери врз кои Врховниот суд не го применил законот за амнестија поднесоа барање за заштита до Уставниот суд, барајќи негова примена и укинување на налогот за апсење издаден за политичарите бегалци во Белгија.

Судот ги прифати жалбите и отвори посебна постапка за преиспитување на налогот за апсење, но датум за донесување одлука сè уште не е одреден.

Во поднесокот на Пуџдемон, кој се приклучува на барањето на неговиот поранешен министер, Тони Комино, кој исто така е во бегство во Белгија од октомври 2017 година, се наведува дека мислењето на генералниот адвокат на ЕУ, објавено минатиот четврток, утврдило дека законот за амнестија „е целосно компатибилен со правниот поредок на Унијата“.

Бидејќи Уставниот суд, кој треба да одлучи за нивното барање за заштита од одлуката на Врховниот суд да не им даде амнестија, веќе ја потврдил целосната уставност на законот, законот „не може да биде лишен од својата практична ефикасност поради времетраењето на рестриктивните кривични мерки“.

Мислењето на генералниот адвокат не е обврзувачко, а конечната правно обврзувачка одлука ќе ја донесе Судот на правдата на Европската Унија.

Сепак, адвокатот на Пуџдемон тврди дека „судецинската пракса доследно го следи образложението на генералниот адвокат, што им дава на неговите тврдења неоспорна правна тежина“.

„Не е можно да се одржат налозите за апсење, дури ни привремено, кога европските стандарди бараат нивно итно укинување штом ќе се исполнат условите на законот“, рече адвокатот на Пуџдемон. Затоа, Пуџдемон бара од Уставниот суд да ја суспендира наредбата за апсење и притвор и „експлицитно да утврди дека суспензијата ќе остане на сила сè додека Судот не донесе конечна пресуда во овој случај“.

Пучдемон, како што потсетува „Еуроњуз“, избега од Шпанија во 2017 година по организирањето на референдумот за независност во Каталонија, што предизвика полициска акција, бегајќи од земјата во багажникот на автомобил за да избегне апсење.

Поранешниот каталонски лидер се соочува со обвиненија за бунт, поттикнување бунт и злоупотреба на јавни средства, што носи максимални казни до 30 години затвор.

Шпанија донесе закон за амнестија во мај 2024 година за да помилува стотици сепаратисти вклучени во гласањето во 2017 година, но Врховниот суд пресуди дека тој не може да се примени на Пуџдемон поради обвиненија за проневера.