Професорот на Факултетот за земјоделски науки и храна Златко Арсов, вечерва во емисијата „Бизнис21“ на телевизијата „21“, дебатирајќи околу Законот за заштита од пушење, рече дека најголеми загуби ќе претрпат компаниите кои произведуваат и продаваат тутунски производи.

„Без разлика дали е на големо или мало, најголема штета ќе претрпат компаниите кои произведуваат и продаваат тутунски производи. Кога зборувам на мало, зборувам за самопослуги и слични продавници, каде што треба да се држат во некои сандачиња.“, рече Арсов.

Тој смета дека Министерството за здравство, пред да го подготви предлог-законот, морало да се консултира со експерти од тутунската струка за тоа какво влијание новиот пропис ќе има врз оваа индустрија.

„Не ми е јасно зошто министерството за здравство не се консултираше со луѓе од тутунската струка, кога го пишувале овој закон“, вели Арсов и додава дека предлог-законот бара „сериозна доработка“.

„Тој не треба да се донесе додека не се доработи како што треба“, рече професорот.

ВИДЕОАНКЕТА: Како реагираат граѓаните на најавата за нов антипушачки закон?