Вишото јавно обвинителство во Зајечар повторно поднесе обвинение против Дејан Драгијевиќ (50) од Злот и Срѓан Јанковиќ (50) од Лука, кои се осомничени за тешко убиство на двегодишната Данка Илиќ во населбата Бањско Поље. Обвинението е доставено откако Вишиот суд го врати претходниот документ на доработка, со барање за подетално разјаснување на фактичката состојба, пренесува Телеграф.

Од обвинителството наведуваат дека во законскиот рок прибрале дополнителни податоци и повторно го доставиле предметот до судот на потврда. Со обновеното обвинение, Драгијевиќ и Јанковиќ се товарат дека на 26 март 2024 година со службено возило удриле девојче, по што, според сомневањата, наместо да му помогнат, го ставиле детето во автомобил.

Како што се наведува во обвинението, девојчето починало, а телото било фрлено на депонија. Подоцна, според сомневањата на обвинителството, телото било преместено на засега непозната локација. Во предметот е опфатен и Радослав Драгијевиќ, кој се сомничи за помагање при извршување на кривичното дело и за непријавување на кривично дело.

Обвинение и без пронајдено тело

И покрај тоа што телото на Данка Илиќ не е пронајдено ни по повеќемесечна потрага, обвинителството смета дека располага со доволно докази за поднесување обвинение.

Како клучни докази се наведуваат GPS и навигациските податоци од службеното возило, кои, според обвинението, го прикажуваат движењето и задржувањето во областа каде што детето исчезнало.

Дополнително, обвинителството се повикува и на искази на сведоци кои, според нив, го потврдуваат присуството на осомничените во Бањско Поље во критичниот период, како и на ДНК траги и други биолошки наоди собрани за време на истрагата.

Вишиот суд во Зајечар сега треба да го разгледа обновеното обвинение. Судот може да го потврди и да закаже главна расправа, да го врати предметот на дополнување или да го отфрли доколку оцени дека нема доволно докази.

Доколку обвинението биде потврдено и вината се докаже на суд, на осомничените им се заканува доживотен затвор.

До каде е случајот со исчезнатата Данка?