Куба синоќа повторно остана без струја, откако по третпат овој месец целосно падна електроенергетската мрежа во земјата. Истовремено, четири демократи-членови на Конгресот кои беа на Куба изминатиов викенд го опишаа енергетското ембарго на Доналд Трамп врз островот како претворање на Куба во „тивка Газа“, пренесува Ал Џазира.

„Енергетскиот систем е целосно исклучен“, објави Министерството за енергетика на Куба на „Икс“, додавајќи дека веднаш биле активирани процедурите за обновување на снабдувањето со електрична енергија.

Ова е трет ваков инцидент за помалку од две недели, а доаѓа во време кога ембаргото за нафта на САД врши голем притисок врз мрежата на островот.

Државната компанија „Електропривреда“ објави дека проблем во производствена единица во источната покраина Холгин предизвикал „ненадејна промена на фреквенцијата“, што довело до пад на системот околу пладне.

Во текот на попладнето, некои делови од главниот град Хавана повторно добија струја, а властите објавија дека четири проценти од градот се напојувани. Некои провинции, вклучувајќи ги Гвантанамо и Сиенфуегос, објавија дека почнале да снабдуваат електрична енергија со своите болници, додека Матанзас потврди дека струјата е вратена во историскиот центар на градот.

Минатата недела, два национални прекини на електричната енергија, во понеделник и петок, оставија повеќе од девет милиони Кубанци во мрак. На ова мора да се додадат уште два прекини во март, како и неколку регионални.

Прекините на електричната енергија имаат огромно влијание врз населението и, во комбинација со енергетското ембарго, доведоа до ограничувања во транспортот, намалено работно време и откажувања на летови, со сериозни последици за јавното здравје. Прекините, исто така, влијаеја на основните услуги како што се готвењето, водоснабдувањето, интернетот и телефонијата.

Куба има недостиг на гориво од јануари, кога американскиот претседател Доналд Трамп се закани дека ќе воведе тарифи за секоја земја што снабдува или продава нафта на островот. Ова дополнително ја влоши постојната финансиска и економска криза. Куба произведува само 40 отсто од горивото што ѝ е потребно, а решение за увоз сè уште не е на повидок.

Вашингтон воведе енергетско ембарго во јануари по апсењето на тогашниот венецуелски претседател Николас Мадуро. Овие мерки ја продлабочија петгодишната криза предизвикана од претходните санкции и неуспешните домашни политики, како што е монетарното обединување.

Куба е во мрак – нема струја