Курт Исвариенко, поранешниот сопруг на Шенон Доерти, сè уште е на суд со управителите на нејзиниот имот две години по нејзината смрт од рак. Луѓето што управуваат со имотот на актерката се обидуваат да се осигурат дека 51-годишниот фотограф го почитува потпишаниот договор за развод.

Сепак, во новите судски документи, поднесени во среда, 14 јануари, адвокатот на Исвариенко тврди дека потпишаниот договор за развод е доставен до погрешен суд, што ја доведува во прашање надлежноста на судот во овој случај, пренесува „Ју-ес викли“.

Ѕвездата на серијата „Беверли Хилс, 90210“ почина на 13 јули 2024 година на 53-годишна возраст, по речиси децениска борба со ракот, а нејзините колеги сè уште се сеќаваат на неа со голема љубов. Доерти го потпиша договорот за развод на 12 јули 2024 година, додека Исвариенко го потпиша на 13 јули 2024 година, а судијата го одобри договорот на 15 јули 2024 година.

Сега Исвариенко во новите судски барања тврди дека разводот воопшто не требало да се спроведе преку судот, бидејќи смртта на Шенон Доерти на 13 јули автоматски го прекинала бракот. Поради оваа причина, тој верува дека судот нема законско овластување да ги спроведува одредбите од договорот.

Во правните документи добиени од „Дејли мејл“, се вели дека Исвариенко не исполнил неколку обврски од пресудата за развод, вклучително и дека не го ставил на продажба домот од 1,5 милиони долари што го делеле во Дрипинг Спрингс, Тексас, до одреден рок. Тој е обвинет и за задржување на повеќе од 50.000 долари што наводно ги должи и за невратување на личните работи на Шенон Доерти.

Тврдењата беа изнесени во барање поднесено од Крис Кортако, повереник на Фондацијата на семејството Шенон Доерти, во обид да стане законски наследник со право да ја спроведе пресудата меѓу Доерти и Исвариенко.

По смртта на Шенон Доерти, нејзините адвокати поднесоа тужба: Еве за што го обвинуваат нејзиниот поранешен сопруг