Поради снежните врнежи прогласена е вонредна состојба во девет општини во Србија, односно на целата територија на градовите Лозница, Ваљево, општините Осечина, Мали Зворник, Крупањ, Владимирци, Мајданпек, Сјеница, како и на дел од територијата на општина Пријепоље. Како што пренесе РТС повикувајќи се на Секторот за вонредни ситуации (СВС) при МВР, од почетокот на снежните врнежи, од 4 јануари до утрово во 6 часот, имало 72 интервенции, со ангажирани 175 пожарникари-спасувачи, 77 возила, 19 пумпи и три чамци.

Најмногу интервенциите се однесувале на отстранување паднати дрвја, отстранување вода и интервенции на итната помош.

Од 4 јануари до денес се евакуирани 30 лица.

И понатаму има проблеми со снабдувањето со електрична енергија во Мачванскиот, Колубарскиот, Златиборскиот, како и во Моравичкиот и Борскиот управен округ.