Внатрешна контрола до Обвинителството во Битола поднесе кривична пријава против млад полицаец, кој, во време кога не бил на должност, отишол во претпријатието за паркинг и поднел барање за да се поништи налогот за незаконски паркираното „ауди“ на брат му, а притоа дал лажна изјава дека возилото е сопственост на МВР.

„Одделот за внатрешна контрола, криминалистички истраги и професионални стандарди до ОЈО Битола поднесе кривична пријава против И.Д. поради постоење основи на сомнение за сторено кривично дело ,,злоупотреба на службената положба и овластување“, предвидено и казниво по член 353 став 1 од КЗ. И.Д., на работно место „помлад полицаец“ во ПС Битола на 25.03.2026 околу 17:00 часот, во период кога не бил работно ангажиран, отишол во просториите на ЈП за изградба и одржување на јавен простор за паркирање и уредување и организирање на јавен локален превоз на патници во Општина Битола, се претставил дека е полициски службеник и поднел барање за поништување на налог за наплата за нерегуларно паркирање на патничко моторно возило „ауди“, сопственост на неговиот брат, при што во рубриката „образложение на причината за поништување на налогот“ своерачно напишал МВР. Со наведеното дејствие дал лажна изјава дека возилото е сопственост на МВР со што сакал да ги доведе во заблуда вработените на ЈППЈЛП за да биде ослободен од плаќање на казната“, соопшти МВР.

Оттаму велат дека ќе има постапка за утврдување дисциплинска одговорност на полицаецот.

Групна тепачка во Прилеп – татко и син истепани од зетот и петмина насилници