Јавен обвинител денеска поднел барање за поведување на подготвителна постапка до судија за деца во Кривичниот суд Скопје за четирите тинејџерки кои малтретираа 13-годишно девојче во скопската населба Ѓорче Петров. Тие се гонат за насилство, но постапката за нив се води според Законот за правда за децата.

Обвинителот поднел и предлог за определување мерки на претпазливост за девојчињата.

-Во меѓувреме, во врска со истите настани, до Основното јавно обвинителство Скопје вчера се доставени шест кривични пријави по член 201 од Кривичниот законик – Запуштање и малтретирање дете, против лица кои како родители ја запоставиле својата должност за грижа и воспитување, а како резултат на тоа малолетните деца на пријавените лица извршиле кривично дело Насилство, односно физички напад врз 13-годишната малолетничка во Ѓорче Петров. Пријавите се распоредени и по нив се постапува за обезбедување докази за проверка на наводите во редовна постапка – велат од Обвинителството.

Според Законот за правда за децата, истражната постапка ќе се води во Судот, а потоа предметот се враќа во Обвинителството кое одлучува дали ќе поднесе предлог за санкции. МВР поднесе пријави против четирите девојчиња и шест пријави против нивните родители за ужасното насилство кое се случувало во два наврати, на крајот на март и една недела подоцна.

Приведен гостиварец, се сомничи дека силувал малолетничка, па објавувал снимки на социјалните мрежи