Познатиот комичар и писател Тревор Ноа шеста година по ред ќе биде водител на доделувањето на наградите „Греми“. Ова ќе биде и последен пат кога ќе биде во оваа улога, пренесуваат странските медиуми.

Организацијата соопшти дека комичарот ќе се врати на сцената „за последен пат“ на 1 февруари, а покрај тоа што ќе биде водител на церемонијата, тој ќе биде и еден од извршните продуценти.

Само пејачот Енди Вилијамс, кој ги водеше наградите „Греми“ седум пати во текот на 1970-тите, има повеќе појавувања како водител од Ноа.

Ноа самиот беше номиниран четири пати за Греми, а оваа година се натпреварува во категоријата најдобра аудио книга, раскажување приказни и нарација за детската книга „Во некосената трева“.

Инаку, меѓу водечките фаворити за 68-то доделување на наградите „Греми“ се Кендрик Ламар, Лејди Гага и Џек Антоноф. Церемонијата ќе се емитува во живо на „Си-би-ес“ и услугата за стриминг „Парамаунт плус“ во Лос Анџелес.