По раскинувањето со актерот Дејвид Харбор, пејачката Лили Ален доживеа уште еден удар – таа е исклучена од популарната апликација за запознавање „Hinge“. 40-годишната пејачка отворено зборуваше за предизвиците со кои се соочува во пронаоѓањето нова љубов откако кон крајот на минатата година се појави веста за крајот на нејзиниот брак со ѕвездата од „Stranger Things“, пишува „Индепендент“.

Ален ја изнесе својата верзија од приказната за причините за раскинувањето, вклучувајќи ја и нејзината наводна тригодишна афера со Дејвид Харбор, во новиот албум наречен „West End Girl“. Низ 14 песни, поп-ѕвездата не се срами да се осврне на теми за изневерување, отворени врски и зависност од секс. Сепак, таа призна дека албумот не е целосно автобиографски.

„Нешто од него е базирано на вистина, а нешто е фантазија“, рече Ален.

И покрај скршеното срце, пејачката одлучи да се врати во светот на состанувањата преку апликации како Raya и Hinge. Таа го опиша своето искуство како „ужасно“, особено додека се опоравуваше од раскинувањето.

Во разговор за „Interview“, Ален објасни: „Нема ништо подепресивно од стотици луѓе кои воопшто не се како личноста што ја пропуштате. Едноставно е како: „Не, тоа не е тој. Тоа не е тој. Тоа не е тој.“

Пејачката додаде дека како позната личност, тешко ѝ е да излегува со луѓе кои не се дел од јавниот живот. „Во Англија е малку чудно да излегуваш на состанок со мене. За да преминам преку тоа, морам навистина, навистина да бидам заинтересирана за личноста“, рече таа.

Иако барала мажи надвор од светот на славните преку апликации, не останала долго на „Hinge“. Таа тврди дека нејзиниот профил бил забранет затоа што апликацијата сметала дека „лажно се претставува како себеси“.

Нејзиниот обид да го докаже својот идентитет наишол на бирократска пречка. „Им велам: „Можам да докажам дека сум таа личност“. Тие велат: „Ќе мора да ни ја испратите вашата лична карта“. А јас велам: „Всушност, моето име и името на личната карта не се исти“, објасни Ален, чие целосно име е Лили Роуз Беатрис Ален.

Иронично, поранешниот сопруг Дејвид Харбор го запознала токму на апликација за запознавање. За време на гостувањето во „Шоуто на Џонатан Рос“ во 2023 година, таа открила како започнала нивната врска.

„Тоа беше првпат да бидам на таа апликација за запознавање“, се присети таа. „Скролав низ неа и наидов на профилот на Дејвид и притиснав „прифати“. Не знаев кој е. Мислев дека е само секси полицаец од ријалити шоу бидејќи носеше полициска униформа.“