Американскиот актер Џон Траволта доби почесна „Златна палма“ на овогодинашниот Кански филмски фестивал, пред светската премиера на неговиот режисерски деби филм „Ноќен лет до Лос Анџелес“ (Propeller One-Way Night Coach).

Почесната награда му ја врачи директорот на фестивалот Тиери Фремо за време на церемонијата одржана во Кан.

– Не можам да верувам во ова. Ова е последното нешто што го очекував. Рековте дека ова ќе биде посебна вечер, но не мислев дека го мислевте ова. Ова е момент на понизност. Ова е повеќе од Оскар – рекол Траволта со солзи во очите.

Траволта, двократен кандидат за наградата „Оскар“, на фестивалот го претстави првиот игран филм каде што се обиде во улогата на режисер, кој е базиран на неговиот истоимен роман, кој го објави во 1997 година.

Познат по својата долгогодишна страст кон авијацијата и кариерата како пилот, Траволта ја истражува својата фасцинација со летањето и своите детски спомени од откривањето на светот на авијацијата во филмот.

Актерот стекна светска слава со своите улоги во филмовите „Грозница на саботната вечер“, „Брилијантин“, а во текот на својата кариера двапати беше номиниран за наградата на Американската филмска академија.