Невриј Адеми, кој во својство на новинар неделава во Тетово ѝ се обрати на министерката за образование и наука Весна Јаневска со зборовите: „Ти кажавме кога ќе доаѓаш во Тетово да земеш преведувач“, во објава на Фејсбук упатена до премиерот Христијан Мицкоски вели дека не се однесувал непристојно и дека поради изјавите на премиерот добивал „бројни закани од македонски граѓани“.

Коментирајќи го случајот пред два дена, премиерот Мицкоски првин рече дека некои коментари не заслужуваат коментар, за потоа сепак да коментира дека Адеми „одлучил да прави естрада и циркузант од себе“. Денес, пак, Мицкоски во Собранието, одговарајќи на пратеничко прашање, рече дека „не му пречи албанскиот јазик“ и дека „дури и се труди да го научи“, но слично како и министерката Јаневска на забелешката на Адеми, нагласи дека официјален јазик во државата е македонскиот.

Адеми во денешната објава вели дека обвинувањата кон него дека бил непристоен се неточни и дека тие се „обид да се одвлече вниманието од суштинскиот проблем“. Според него, барањето му било „едноставно и фер“ и имплицираше дека со тоа што Јаневска не водела со себе преведувач од албански јазик, таа не го почитувала албанскиот јазик.

„Неприфатливо е јавна функција, избрана со гласови и платена од даноците на граѓаните, да ја избегнува одговорноста да комуницира на јазикот на секој граѓанин на оваа земја. Моето барање е едноставно и фер: почитување на мојот мајчин јазик – албанскиот. Наместо да одговорат на ова елементарно барање, тие се обидуваат да ме етикетираат и дискредитираат. Ова не е само неправедно, туку е и јасен показател за недостатокот на волја за еднаквост и институционално почитување“, пишува Адеми во објавата на Фејсбук.

На однесувањето на Адеми вчера реагираше Агенцијата за аудио и аудиовизуелни медиумски услуги (АВМУ), која ги потсети медиумските работници дека при извршувањето на работните задачи од својата професија треба доследно да ги почитуваат професионалните новинарски стандарди и принципи.

„Комуникацијата помеѓу новинарите и носителите на јавни функции треба да биде коректна,достоинствена и базирана на заемна почит, со висок степен на професионализам и одговорност. Агенцијата потсетува дека критичкото известување и поставувањето прашања се суштински дел од новинарската работа, но тие треба да бидат формулирани и презентирани во согласност со етичките норми на начин што не навредува, не дискредитира и не создава непотребни тензии“, порачаа од АВМУ.

Вреди: Министерката Јаневска е фрустрирана, не знае ни збор албански, а реагира дека не го разбира Касами