Остар пад на цената на нафтата на светските нафтени пазари откако беше објавена рамка за мировен договор меѓу САД и Иран и план за повторно отворање на Ормускиот Теснец, најважниот енергетски коридор во светот низ кој поминува околу една петтина од глобалната трговија со нафта.

Цената на северноморската нафта брент падна за околу 4–5 проценти и се спушти на околу 83–84 долари за барел, додека американската WTI изгуби повеќе од 5 проценти. Тоа е едно од најголемите дневни намалувања во последните месеци- пишува Ројтерс.

Главната причина е што инвеститорите почнаа да го отстрануваат т.н. „геополитички премиум“ од цената на нафтата. Во претходните недели стравот од ескалација на конфликтот и можни прекини во снабдувањето ја туркаше цената нагоре. Со најавата за прекин на непријателствата и враќање на транспортот низ Ормускиот Теснец, пазарот процени дека ризикот од недостиг на нафта значително се намалува.

Сепак, аналитичарите предупредуваат дека е прерано да се прогласи крај на кризата. Иако договорот донесе олеснување, обновувањето на испораките, инфраструктурата и танкерскиот сообраќај може да потрае со месеци. Осигурителните трошоци остануваат високи, а секое ново влошување на односите може повторно да предизвика скок на цените.

За земјите увозници, меѓу кои се и европските економии, поевтината нафта носи можност за намалување на инфлаторните притисоци и пониски трошоци за транспорт и енергија. Затоа берзите позитивно реагираа, додека инвеститорите очекуваат дополнително стабилизирање на енергетските пазари во наредните недели.

Поскапувањето на нафтата на Русија ѝ носи милијарди евра