Британскиот премиер Кир Стармер денеска објави дека на децата под 16 години ќе им биде забранет пристапот до сите главни апликации на социјалните мрежи.

„Водењето земја е секогаш прашање на избор и ми е јасно дека целосната забрана е вистинската“, изјави Стармер на прес-конференција, објави Скај њуз.

Стармер истакна дека социјалните мрежи ги прават децата несреќни, отвораат простор за вознемирување и злоупотреба и го оштетуваат нивното ментално здравје. Тој, исто така, ги истакна опасностите од штетната содржина на која се изложени децата.

„Нема да правам компромис во врска со безбедноста и среќата на нашите деца и затоа оваа забрана мора да се спроведе. И ќе се спроведе“, рече тој.

Тој објасни дека производите што не се опфатени со општата забрана, како што се платформите за игри, ќе мора да ги спречат децата да комуницираат со странци. Стармер додаде дека можноста некои деца да најдат начини да ја заобиколат забраната не треба да биде причина за нејзино напуштање.

„Ова ќе ги направи нашите деца посреќни. Ќе им дадеме повеќе време, повеќе безбедност, повеќе слобода да растат и повеќе можности. Тоа е, на крајот на краиштата, она за што се залага оваа влада“, заклучи британскиот премиер.

Не, телефоните не нѐ прислушуваат, ама прават нешто уште полошо

Користите социјални мрежи пред спиење? Еве што му правите на мозокот