Четвртиот најбогат човек во светот, Џеф Безос, не мисли дека вештачката интелигенција (ВИ) ќе предизвика масовно уништување на работни места. Наместо тоа, тој верува дека веќе живееме на почетокот на „златна доба“.

Во изјава за деловниот весник „Фајненшл тајмс“, тој рече дека неговата компанија за вештачка интелигенција „Прометеј“, вредна 41 милијарда долари, користи вештачка интелигенција за да ги трансформира производството и инженерството.

„Оние кои брзаат со заклучокот дека сите работни места ќе исчезнат, едноставно грешат“, рече тој.

Тој рече дека вештачката интелигенција ќе доведе до голем бум во неговата огромна бизнис-империја, која вклучува истражување на вселената, роботика, испорака и истражување на долговечноста.

„Сите работи на кои работам денес имаат некаква врска со вештачката интелигенција. Моментално сме во средината на повеќе златни времиња, секако со вештачката интелигенција. Ова важи и за вселената, како и за други области како што е биотехнологијата. Мислам дека во следната деценија ќе бидеме сведоци на низа неверојатни чуда што ќе се случат тука“, нагласи тој.

Тој очекува дека вештачката интелигенција ќе резултира со недостиг на работна сила, поттикнувајќи го создавањето нови работни места многу повеќе отколку затворањето на постојните.

Како што истакна, цивилизацијата почнала да се збогатува со пронајдоци – некој го измислил плугот пред шест илјади години и сите ние станавме побогати, пишува „Фајненшл тајмс“.

Кој е навистина Џеф Безос – еден од најбогатите луѓе во светот?