За првпат по повеќе од две децении, Академијата за филмска уметност и наука (АМПАС) ќе доделува Оскар за достигнувања во кастингот, со што првпат ќе им оддаде признание на холивудските директори за кастинг. Категоријата беше одобрена од Управниот одбор на Академијата во 2024 година.

Извршниот директор на Академијата, Бил Крејмер, и претседателката Џенет Јанг во заедничка изјава истакнаа дека директорите за кастинг играат клучна улога во создавањето филмови и дека е важно нивната работа конечно да биде официјално препознаена.

Ова е прва нова натпреварувачка категорија од 2002 година, кога беше воведена наградата за најдобар анимиран филм.

Во раните години на холивудскиот студиски систем, директорите за кастинг честопати биле занемарувани иако биле одговорни за организирање аудиции, откривање нови таленти и избор на актерска екипа.

Дури во 1968 година директор за кастинг добил индивидуално признание во воведните титлови на голем филм. Станува збор за Лин Сталмастер за филмот „The Thomas Crown Affair“. Подоцна, во 2016 година, Сталмастер стана првиот директор за кастинг кој доби почесен Оскар.

Процесот на убедување на Управниот одбор на Академијата да воведе посебна категорија траел со години. Ким Тејлор-Колман, членка на одборот од кастинг одделот на Академијата, изјави дека заедно со режисери, продуценти и актери од целата индустрија работеле на иницијативата да се признае значењето на оваа професија.

Петмината номинирани за првата награда на Оскар за достигнувања во кастингот се:

– Нина Голд – за филмот „Hamnet“

– Џенифер Вендиити – за „Marty Supreme“

– Касандра Кулукундис – за „One Battle After Another“

– Габриел Домингеш – за „The Secret Agent“

– Франсин Мајслер – за „Sinners“

Без оглед кој ќе победи, оваа награда ќе претставува важна пресвртница за филмската индустрија, бидејќи за првпат официјално ќе се оддаде признание на клучната улога на директорите за кастинг во создавањето на филмовите.