Членките на ОПЕК плус денеска објавија дека ќе го зголемат производството на нафта за 137.000 барели дневно во декември, додека понатамошните зголемувања ќе бидат паузирани во првиот квартал од 2026 година поради загриженоста за прекумерна понуда на пазарот.

Како што објави Ројтерс, ОПЕК Плус ги зголеми своите производствени цели за околу 2,9 милиони барели дневно од април, што е околу 2,7 проценти од глобалната понуда, но го забави темпото од октомври поради прогнозите за можна прекумерна понуда.

Во соопштението се наведува дека на месечниот состанок на земјите-членки Саудиска Арабија, Русија, Обединетите Арапски Емирати, Ирак, Кувајт, Оман, Казахстан и Алжир, тие се согласиле да го одржат истото ниво на зголемување како во октомври и ноември, и да го паузираат растот на производството во јануари, февруари и март следната година, објавува Танјуг.