Одбојкарската репрезентација на Македонија денеска од 16 часот во Будимпешта го игра полуфиналниот натпревар против Финска на завршниот турнир од Европската сребрена лига.

Одбојкарите пласманот на завршниот турнир го обезбедија со освојувањето на второто место во групата, а големи заслуги има и Романија која во последното коло ја победи Албанија со 3:0.
Противник на избраниците на селекторот Ратко Павличевиќ е селекцијата на Финска.

– Јасно е дека не сме фаворит против Финска, но исто така и не сме некој голем аутсајдер. Се ќе зависи од тоа како ќе пристапиме на натпреварот, мора да бидеме навистина зрели во играта, паметни и храбри бидејќи противникот прави многу малку грешки. Затоа клучот на натпреварот ќе биде како ние ќе одреагираме на нивната игра. Иако се подмладени ја негуваат истата игра како на претходните европски првенства. Сериозно ги анализиравме, и ќе биде важно кој подобро ќе се снајде на оние неколку лесни топки во текот на сетот. Најголемиот дел играат во зона четири и тука ќе мора да ги запреме, па се надевам на позитивен резултат – вели капитенот Никола Ѓорѓиев.