Во атмосфера исполнета со креативна енергија и силна актерска посветеност, течат подготовките за новиот мјузикл „Као какао“, чија премиера е закажана за 2 и 3 јуни во Македонскиот народен театар во Скопје.

Проектот, кој е идеја и реализација на „Баги комуникации“, веќе предизвикува голем интерес во јавноста и обединува еминентни имиња од македонската театарска и музичка сцена. Под режисерската палка на Дејан Пројковски, ансамблот интензивно работи на создавање сценско дело кое ветува силен визуелен и емоционален впечаток.

На пробите може да се почувствува посебна хемија меѓу актерите. Тања Кочовска и Јордан Симонов со својата препознатлива енергија и искуство внесуваат живост во процесот.

Во креативниот тим се вклучени и врвни уметници како Влатко Стефановски, чиј музички потпис му дава посебна тежина на мјузиклот, како и пејачката и професорка Ана Костадиновска, која активно учествува во вокалниот дел.

„Као какао“ е првиот македонски мјузикл инспириран од музиката на Влатко Стефановски, а премиерно ќе биде изведен во јуни, во продукција на „Баги комуникации“, со Македонскиот народен театар како копродуцент.

Текстот за мјузиклот го напиша Венко Андоновски, а режисер е Дејан Пројковски. Претставата ќе вклучи 19 композиции од Стефановски, кои ќе бидат изведени во нови аранжмани, специјално подготвени од Бобан Мирковски.

Извршниот продуцент Владимир Мандичевски-Манде вели дека идејата за проектот постоела три години.

„Текстот на Венко ме насмеа трипати, а ме расплака двапати. За мене, тоа е најдобрата потврда дека е навистина добар. Не се сомневам во режисерските квалитети на Пројковски, ниту во младите актери и верувам дека ова ќе биде интересен и успешен проект“, рече Влатко Стефановски.