„Њујорк Тајмс“: Прекинот на тестовите на вакцината на „АстраЗенека“ е поради воспаление на ‘рбетен мозок на волонтер
Завршните клинички испитувања на вакцината против коронавирус што заеднички ја развиваат Универзитетот во Оксфорд и британското-шведска фармацевтска компанија „АстраЗенека“ се прекинати по несакана реакција кај еден од учесниците во проектот. Иако фармацевтската компанија не даде детали за негативната реакција што е развиена од еден од вакцинираните волонтери, во меѓувреме се појави информација дека тој има трансверзален миелитис, односно воспаление на ‘рбетниот мозок, пренесува „Би-Би-Си“.
„АстраЗенека“ го опиша прекинот како „рутински”, а болеста како „необјаснета”. Сепак, „Њујорк Тајмс” известува дека доброволец во британската група испитаници развил воспалителен синдром кој влијае на ‘рбетниот мозок и кој може да биде резултат на вирусна инфекција или жариште на автоимуна болест.
Оваа болест вклучува целосен попречен пресек на ‘рбетниот мозок што спречува комуникација меѓу мозокот и телото под нивото на воспаление. Симптомите се манифестираат само во дел од телото под линијата на воспаление и се поврзани со тешко движење и сензорни проблеми.
Времето на дијагностицирање, како и дали е поврзано со примената вакцина, сè уште не е познато. Независна истрага допрва треба да утврди дали болеста е последица на реакција на вакцината.
„Би-Би-Си“ наведува дека ова е вторпат тестирањето на вакцината на Оксфорд да биде стопирано, по априлското, кога започна тестирањето врз луѓе. Конечното одобрување за продолжување на тестирањето го издава надлежен здравствен регулатор и оваа постапка трае неколку дена, но дотогаш сите понатамошни вакцинации во сите земји кои учествуваат во тестирањето се привремено прекинати.