Европскиот центар за контрола и превенција на болести (ЕЦДЦ) предупреди дека „растот на варијантите БA.4 и БA.5 на омикронот сугерира дека тие ќе станат доминантни“ и дека веројатно ќе резултира со пораст на нови случаи.

Бројките на заразени со коронавирусот расте насекаде низ светот, а во последните денови и Македонија бележи трицифрена бројка на заразени со ковид-19 на дневно ниво.

И покрај водечките соеви на коронавирусот, кои се карактеризираат со симптоми како зголемена телесна температура, главоболка, малаксаност, болки во мускулите и течење на носот, лекарите предупредуваат дека новата подваријанта удира и на стомакот.

„Кај две третини од пациентите со коронавирус може да се појави гадење и повраќање. Приближно 40 отсто од пациентите со ковид ќе имаат губење на апетит, а до 50 отсто ќе имаат дијареја, болките во стомакот се поретки, а се појавуваат кај помалку од 10 отсто“, се наведува во студијата.

Во некои земји е регистрирана варијантата БА.5 на ковид-19, која досега се смета за најзаразна, а експертите предупредуваат на еден необичен симптом што го предизвикува, а кој се појавува навечер.

Професорот Лук О’Нил предупреди дека оваа варијанта на коронавирусот „прави хаос“ ширум светот, а всушност, станува збор за подваријанта на омикрон.

„Еден дополнителен симптом којшто го предизвикува варијантата БА.5 е ноќното потење. Болеста сега е малку поинаква бидејќи вирусот се промени. Постои одреден имунитет, важни се Т-клетките, а мешавината на имунолошкиот систем и тие мали разлики во вирусот може да даде и малку поинаква болест, со ноќно потење“, вели професорот О’Нил.