Ништо од чистиот воздух: Оџакот на студентскиот дом Кузман Јосифовски-Питу ги „отру“ скопјани
Граѓанската О2 Иницијатива објави фотографија која се рашири на социјалните мрежи, каде може да се забележи густ чад од оџакот на студентскиот дом „Кузман Јосифовски-Питу“ во Скопје.
По силните реакции и на граѓаните и на организациите кои се борат против загадувањето, O2 Иницијативата потсети дека властите не го исполниле ветувањето дека студентскиот дом од мазут ќе се префрли на централно греење.
„Само да се потсетиме дека префрлањето од мазут на централно греење на студентскиот дом Кузман беше ветено како ПРВА активност која ќе се реализира во рамки на Програмата за намалување на аерозагадувањето за 2019, од План за чист воздух. Еве го резултатот.
Незгодно барем малце да им паднеше на толку ветувања, фанфари, да не спроведеш до волку, па уште да си ветил како прва активност за годината, која еве завршува. Да се повлечеше некој од функција, да кажеше, јас сум одговорен за ова и се повлекувам. Не. Ништо. Само бла, бла, бла. Из шупљег у празно“, напишаа од О2 Иницијатива.