Основното јавно обвинителство Скопје донесе наредба за спроведување истражна постапка против Американецот со потекло од Нигерија, кој вчера нападна полицаец пред ноќен клуб во Градскиот парк.

-На 21 декември во раните утрински часови, пред ноќен клуб во Градскиот парк, осомничениот нападнал полицаец кој се обидел да го легитимира. Со удари со тупаници му нанел телесна повреда на полицаецот, а потоа бил совладан и кај него бил пронајден полуавтоматски пиштол „глок“ со калибар 9 мм Para, како и две рамки со 30 куршуми за тој пиштол – соопшти Обвинителство.

Откако било утврдено дека странскиот државјанин престојува во хостел во Скопје, јавниот обвинител обезбедил наредба за претрес и во собата во која престојувал осомничениот исто така било пронајдено поголемо количество оружје и муниција – уште еден пиштол „глок“, три рамки со по 15 куршуми, дополнителни 75 куршуми во зипер ќеси, комплет за чистење оружје, три ножа, како и други предмети – фантомка, тактички ракавици, бандажери за раце, сајли за врзување, УСБ и хартиени документи, за кои е издадена наредба за вештачење.

Јавниот обвинител до судијата на претходна постапка доставил предлог за определување мерка притвор за осомничениот, бидејќи постои реална опасност од бегство, можност да влијае врз постапката и сведоците и да ги прикрива доказите, како и опасност да изврши друго кривично дело.