Женската тениска репрезентација на Македонија од утре ќе ги стартува мечевите од Втората Евроафриканска зона што се играат во Вилнус, Литванија. На денешната ждрепка за ривали ги добивме Хрватска и Естонија во рамките од „А“ групата.

Вкупно 11 репрезентации се дел од ова натпреварување, а поделени се во три групи. Во групата „Б“ се селекциите на домаќинот Литванија, Босна и Херцеговина, Израел и Мароко, а во групата „Ц“ се Египет, Грузија, Косово и Малта.

За годинашниве мечеви за нашата репрезентација селекторот Димитар Лабудовиќ ги повика Лина Ѓорческа, Магдалена Стоилковска, Ива Данева, Ана Митевска и Теона Андова.

Првопласираните селекции од групите во „нова група“ ќе се борат за првите две места што значат промоција во Првата Евроафриканска зона, додека второпласираните и третопласираните истотака ќе формираат групи на „вторите“ и на „третите“ за пласман од четвртото до шестото место, односно за пласман од седмото до деветтото место.

Македонија в понеделник во првото коло ќе игра против Естонија, која е предводена од ветеранката Каја Канепи (226 место на ВТА листа). Македонија и Естонија имаат одиграно еден меч досега во 1996 година во рамките на Втората Евроафриканска зона во Израел и победа од 2:1 има постигнато Естонија. Почетокот на мечевите е во 12.00 часот по локално време или 11.00 по македонско време.